திண்டுக்கல் மாவட்டம், கொடைக்கானல் சர்வதேச சுற்றுலாத் தலமாக விளங்கி வரும் நிலையில், அதிகரித்து வரும் சுற்றுலா வாகனங்களால் முக்கிய சாலைகளில் நாள்தோறும் கடும் போக்குவரத்து நெரிசல் ஏற்பட்டு வருகிறது. குறிப்பாக பெருமாள்மலை முதல் செண்பகனூர் வரையிலான பகுதிகளில் நெரிசல் அதிகரித்து வருவதாக பொதுமக்களும் வாகன ஓட்டிகளும் தெரிவிக்கின்றனர்.
இந்த நிலையில், நெடுஞ்சாலைத்துறைக்கு சொந்தமான சாலையோர நிலங்கள் ஆக்கிரமிக்கப்பட்டுள்ளதாகவும், இதனால் சாலைகள் குறுகி போக்குவரத்துக்கு இடையூறு ஏற்படுவதாகவும் தொடர்ந்து புகார்கள் எழுந்துள்ளன.
பெருமாள்மலை–செண்பகனூர் சாலைப் பகுதியில் கடந்த சில மாதங்களாக நெடுஞ்சாலைத்துறைக்கு சொந்தமானதாக கூறப்படும் நிலப்பகுதிகளில் அனுமதியின்றி பாறைகள் உடைக்கப்பட்டு, 100-க்கும் மேற்பட்ட லாரிகளில் கனிம வளங்கள் எடுத்துச் செல்லப்பட்டதாகவும் குற்றச்சாட்டு எழுந்துள்ளது.
இதுகுறித்து சம்பந்தப்பட்ட துறை அதிகாரிகள் உரிய நடவடிக்கை எடுக்காதது ஏன்? அதிகாரிகளின் கண்காணிப்பு இல்லாததற்கு காரணம் என்ன? என்ற கேள்விகளும் பொதுமக்கள் மத்தியில் எழுந்துள்ளன.
நெடுஞ்சாலைத்துறைக்கு சொந்தமான நிலங்கள் முறையாக அளவீடு செய்து பாதுகாக்கப்படவில்லை என்றும், சாலையோர அரசு நிலங்கள் தனிநபர்களால் ஆக்கிரமிக்கப்பட்டுள்ளதாகவும் தொடர்ந்து புகார்கள் தெரிவிக்கப்படுகின்றன.
குறிப்பாக, நெடுஞ்சாலையின் இருபுறங்களிலும் அரசுக்கு சொந்தமான நிலங்களின் உண்மையான எல்லைகளை வருவாய்த்துறை மற்றும் நெடுஞ்சாலைத்துறை அதிகாரிகள் இணைந்து முழுமையாக அளவீடு செய்து, ஆக்கிரமிப்புகள் இருந்தால் அவற்றை சட்டப்படி அகற்ற வேண்டும் என பொதுமக்கள் வலியுறுத்துகின்றனர்.
கொடைக்கானலில் போக்குவரத்து நெரிசலை கட்டுப்படுத்த புதிய மாற்றுச்சாலை அமைப்பது குறித்து தொடர்ந்து ஆலோசிக்கப்பட்டு வருகிறது. ஆனால், ஏற்கனவே அரசுக்கு சொந்தமான நெடுஞ்சாலை நிலங்கள் ஆக்கிரமிக்கப்பட்டிருந்தால், அவற்றை முதலில் மீட்டு சாலைகளை அகலப்படுத்துவதற்கான வாய்ப்புகளை ஆய்வு செய்ய வேண்டும் என வாகன ஓட்டிகள் தெரிவிக்கின்றனர்.
கொடைக்கானல் ஏரிச்சாலை சந்திப்பு உள்ளிட்ட முக்கிய பகுதிகளில் சாலை விரிவாக்கம் மற்றும் ஆக்கிரமிப்பு அகற்றம் தொடர்பாக நடவடிக்கை எடுக்கப்பட்டுள்ளதாகவும், சம்பந்தப்பட்ட பகுதிகளை அளவீடு செய்ய நடவடிக்கை மேற்கொள்ளப்படும் என்றும் நெடுஞ்சாலைத்துறை தரப்பில் தெரிவிக்கப்பட்டுள்ளதாக கூறப்படுகிறது.
கொடைக்கானலுக்கு செல்லும் மலைச்சாலைகளின் தரம், பராமரிப்பு மற்றும் சாலை அகலம் குறித்து வாகன ஓட்டிகள் தொடர்ந்து குறைகளை தெரிவித்து வருகின்றனர். சாலை வசதிகள் போதிய அளவில் இல்லாத நிலையில், நாளுக்கு நாள் அதிகரித்து வரும் சுற்றுலா வாகனங்களை மட்டும் தொடர்ந்து அனுமதிப்பது எப்படி? என்ற கேள்வியும் எழுந்துள்ளது.
கொடைக்கானல் நகரின் வளர்ச்சிக்கும் சுற்றுலாத்துறையின் வளர்ச்சிக்கும் போதிய சாலை வசதி அத்தியாவசியமானதாகும். எனவே, நெடுஞ்சாலைத்துறைக்கு சொந்தமான நிலங்களை முழுமையாக அளவீடு செய்து, ஆக்கிரமிப்புகள் இருப்பது உறுதி செய்யப்பட்டால் பாரபட்சமின்றி அகற்றி, சாலைகளை விரிவுபடுத்த நடவடிக்கை எடுக்க வேண்டும் என பொதுமக்கள் கோரிக்கை விடுத்துள்ளனர்.
மேலும், முக்கிய பிரமுகர்கள் அல்லது செல்வாக்கு மிக்க நபர்களின் நிலங்கள் தொடர்பாகவும் சட்டப்படி ஒரே மாதிரியான நடவடிக்கை மேற்கொள்ள வேண்டும் என்றும் வலியுறுத்தப்பட்டுள்ளது.
ஆக்கிரமிப்புகளால் சாலைகள் குறுகி விபத்துகள் ஏற்படுவதைத் தடுக்க மாவட்ட நிர்வாகமும் நெடுஞ்சாலைத்துறையும் இணைந்து உடனடி நடவடிக்கை எடுக்க வேண்டும் என்பதே பொதுமக்கள் மற்றும் சுற்றுலாப் பயணிகளின் எதிர்பார்ப்பாக உள்ளது.
கொடைக்கானல் போக்குவரத்து நெரிசலுக்கு புதிய சாலை மட்டுமே தீர்வா? அல்லது ஏற்கனவே உள்ள அரசு நெடுஞ்சாலை நிலங்களை முறையாக மீட்டு, சாலைகளை அகலப்படுத்துவது சிறந்த தீர்வா? — இதற்கு தமிழக அரசும் மாவட்ட நிர்வாகமும் தெளிவான நடவடிக்கை எடுக்குமா என்பதே தற்போது எழுந்துள்ள கேள்வியாக உள்ளது.
