தஞ்சாவூர் திருமலைசமுத்திரத்தில் செயல்பட்டு வரும் சாஸ்த்ரா நிகர்நிலைப் பல்கலைக்கழகத்தின் 31.37 ஏக்கர் அரசு நில விவகாரத்தில், சென்னை உயர் நீதிமன்றத்தின் வெளியேற்ற உத்தரவுக்கு உச்ச நீதிமன்றம் இடைக்காலத் தடை விதித்துள்ளது.
மேலும், பல்கலைக்கழகம் முன்வைத்துள்ள மாற்று நிலம் வழங்கும் கோரிக்கையை ஆய்வு செய்வதற்கான வாய்ப்புகளை தமிழக அரசு பரிசீலிக்க வேண்டும் என உச்ச நீதிமன்றம் அறிவுறுத்தியுள்ளது.
திருமலைசமுத்திரத்தில் உள்ள குறிப்பிட்ட நிலம், 1985-ஆம் ஆண்டு திறந்தவெளி சிறைச்சாலை திட்டத்துக்காக சிறைத்துறைக்கு ஒதுக்கப்பட்டதாக கூறப்படுகிறது.
இந்த நிலத்தில் சாஸ்த்ரா பல்கலைக்கழகம் வளாக விரிவாக்கம் செய்து கட்டடங்கள், மாணவர் விடுதிகள் உள்ளிட்ட வசதிகளை ஏற்படுத்தியதாக அரசு தரப்பில் தெரிவிக்கப்பட்டது.
இதையடுத்து, அரசு நிலத்தை மீட்டு சிறைத்துறையின் பயன்பாட்டுக்கு வழங்க தமிழக அரசு நடவடிக்கை மேற்கொண்டது.
இந்த விவகாரம் தொடர்பாக விசாரணை நடத்திய சென்னை உயர் நீதிமன்றம், அரசு நிலத்தை மீட்பது தொடர்பாக உத்தரவு பிறப்பித்தது.
இதனை எதிர்த்து சாஸ்த்ரா பல்கலைக்கழகம் உச்ச நீதிமன்றத்தில் மேல்முறையீடு செய்தது.
வழக்கு விசாரணையின்போது, 12 ஆயிரத்துக்கும் மேற்பட்ட மாணவர்கள் கல்வி பயிலும் நிறுவனம் என்பதையும், பல்கலைக்கழகத்தின் செயல்பாடுகளையும் கருத்தில் கொள்ள வேண்டும் என உச்ச நீதிமன்றம் குறிப்பிட்டது.
அதே நேரத்தில், அரசு நிலத்தை ஆக்கிரமித்த பின்னர் மாற்று நிலம் வழங்கும் நடைமுறையை ஏற்றுக்கொண்டால், அது எதிர்காலத்தில் தவறான முன்னுதாரணமாக அமையும் என தமிழக அரசு தரப்பில் வாதிடப்பட்டது.
இதையடுத்து, சென்னை உயர் நீதிமன்ற உத்தரவுக்கு உச்ச நீதிமன்றம் இடைக்காலத் தடை விதித்துள்ளது.
மேலும், சாஸ்த்ரா பல்கலைக்கழகம் முன்வைத்த மாற்று நிலம் தொடர்பான கோரிக்கையை ஆய்வு செய்ய தமிழக அரசு உயர்மட்டக் குழு அமைத்து பரிசீலிக்கலாம் என அறிவுறுத்தப்பட்டுள்ளது.
இறுதி முடிவு எடுக்கப்படும் வரை மாணவர்களின் கல்வி நடவடிக்கைகளுக்கு இடையூறு ஏற்படாத வகையில் நடவடிக்கை எடுக்க வேண்டும் எனவும் நீதிமன்றம் தெரிவித்துள்ளது.
