எல்ஜி, எவரெஸ்ட் பெருங்காயத் தூள் விற்பனைக்கு தடை

தரப் பரிசோதனையில் விதிமீறல் கண்டுபிடிப்பு: FSSAI அதிரடி நடவடிக்கை

நாடு முழுவதும் பொதுமக்கள் அன்றாட சமையலில் பயன்படுத்தும் பெருங்காயத்தின் தரம் தொடர்பாக இந்திய உணவு பாதுகாப்பு மற்றும் தர நிர்ணய ஆணையம் (FSSAI) அதிரடி நடவடிக்கை எடுத்துள்ளது.

எவரெஸ்ட் ஃபுட் புராடக்ட்ஸ் பிரைவேட் லிமிடெட் மற்றும் எல்ஜி (Laljee Godhoo and Company) நிறுவனங்களின் ‘Compounded Hing’ எனப்படும் பெருங்காயத் தயாரிப்புகளின் விற்பனைக்கு தடை விதித்து FSSAI உத்தரவிட்டுள்ளது.

நுகர்வோர் ஒருவரிடமிருந்து பெறப்பட்ட புகாரைத் தொடர்ந்து, சந்தையில் விற்பனை செய்யப்படும் முக்கிய பெருங்காய பிராண்டுகளின் தரத்தை ஆய்வு செய்ய FSSAI சார்பில் விரிவான கண்காணிப்பு மேற்கொள்ளப்பட்டது.

இதன் ஒரு பகுதியாக, மும்பையில் உள்ள எவரெஸ்ட் மற்றும் எல்ஜி நிறுவனங்களின் உரிமம் பெற்ற உற்பத்தி நிலையங்களில் இருந்து சட்டப்படியான மாதிரிகள் சேகரிக்கப்பட்டு ஆய்வகப் பரிசோதனைக்கு அனுப்பப்பட்டன.

மேலும், குஜராத் மாநில உணவு மற்றும் மருந்து நிர்வாகத்துடன் இணைந்து எவரெஸ்ட் நிறுவனத்தின் குஜராத் மாநிலத்தில் உள்ள உற்பத்தி நிலையத்திலும் ஆய்வு மற்றும் மாதிரி சேகரிப்பு மேற்கொள்ளப்பட்டது. இந்த மாதிரிகளின் ஆய்வில், விதிமுறைகளுக்கு உட்படாத தரக்குறைபாடுகள் இருப்பது உறுதி செய்யப்பட்டதாக FSSAI தெரிவித்துள்ளது.

5 சதவீதம் இருக்க வேண்டிய நிலையில் குறைந்த அளவு
FSSAI விதிமுறைகளின்படி, ‘Compounded Hing’ தயாரிப்பில் மூல பெருங்காயம் (Raw Hing), கம் அரபிக், மாவுச்சத்து மற்றும் உணவு மாவு போன்றவை குறிப்பிட்ட அளவுகளில் பயன்படுத்தப்படலாம்.

ஆனால், இறுதித் தயாரிப்பில் குறைந்தபட்சம் 5 சதவீதம் Alcohol Soluble Extract இருக்க வேண்டும்.

ஆய்வுக்கு எடுத்துக்கொள்ளப்பட்ட எவரெஸ்ட் நிறுவனத்தின் பெருங்காய மாதிரிகளில் இந்த அளவு மிகவும் குறைவாக இருந்தது கண்டறியப்பட்டது.

சில மாதிரிகளில் Alcohol Soluble Extract அளவு 0 முதல் 3 சதவீதம் மட்டுமே இருந்ததாக FSSAI தெரிவித்துள்ளது.

இதன் மூலம், தயாரிப்பில் சேர்க்க வேண்டிய மூல பெருங்காயத்தின் அளவு விதிமுறையில் நிர்ணயிக்கப்பட்ட அளவைவிட குறைவாக இருந்திருக்கலாம் என அதிகாரிகள் தெரிவித்துள்ளனர்.

எல்ஜி மூலப் பெருங்காயத்திலும் அதிக மாவுச்சத்து
எல்ஜி நிறுவனத்தின் மும்பை உற்பத்தி நிலையத்தில் இருந்து தயாரிக்கப்பட்ட பெருங்காயப் பொருட்களுடன், ஆறு வகையான மூலப் பெருங்காய மாதிரிகளும் FSSAI சார்பில் சேகரிக்கப்பட்டு பரிசோதிக்கப்பட்டன.

மூலப் பெருங்காயத்தில் மாவுச்சத்து அதிகபட்சம் 1 சதவீதம் மட்டுமே இருக்க வேண்டும் என்ற நிலையில், பரிசோதிக்கப்பட்ட ஆறு மாதிரிகளிலும் 15 சதவீதம் முதல் 32 சதவீதம் வரை மாவுச்சத்து இருந்தது கண்டறியப்பட்டதாக FSSAI தெரிவித்துள்ளது.

இதனால், அந்த மாதிரிகள் நிர்ணயிக்கப்பட்ட தரத்தை பூர்த்தி செய்யாதவை என வகைப்படுத்தப்பட்டுள்ளன.

பெருங்காயத்தில் ஏன் இவ்வளவு முக்கியத்துவம்?

‘Compounded Hing’ என்பது மூலப் பெருங்காயத்துடன் கம் அரபிக், உணவு மாவுச்சத்து அல்லது உணவு தானிய மாவு போன்றவற்றைச் சேர்த்து தயாரிக்கப்படும் ஒரு அனுமதிக்கப்பட்ட வகை தயாரிப்பாகும்.

இருப்பினும், அதில் மூலப் பெருங்காயத்தின் அளவு மற்றும் அதன் தரம் தொடர்பாக FSSAI குறிப்பிட்ட கட்டுப்பாடுகளை விதித்துள்ளது.

குறிப்பாக, பெருங்காயத்தின் முக்கியத் தரக் குறியீடுகளில் ஒன்றாக Alcohol Soluble Extract கருதப்படுகிறது. இது நிர்ணயிக்கப்பட்ட குறைந்தபட்ச அளவுக்குக் கீழே இருந்தால், தயாரிப்பு தரநிலையை பூர்த்தி செய்யாததாக கருதப்படுகிறது. FSSAI விதிமுறைகளிலும் Compounded Asafoetida-வில் குறைந்தபட்சம் 5 சதவீத Alcoholic Extract இருக்க வேண்டும் என குறிப்பிடப்பட்டுள்ளது.

விற்பனைக்கு தடை

பல தொகுதிகளைச் சேர்ந்த (Batches) Compounded Hing தயாரிப்புகள் நிர்ணயிக்கப்பட்ட தரத்தை பூர்த்தி செய்யவில்லை என்பது ஆய்வில் தெரியவந்ததைத் தொடர்ந்து, எவரெஸ்ட் ஃபுட் புராடக்ட்ஸ் பிரைவேட் லிமிடெட் மற்றும் எல்ஜி பிராண்ட் யூனிட்டுக்கு எதிராக Prohibition of Sale உத்தரவை FSSAI பிறப்பித்துள்ளது.

இந்த நடவடிக்கை பொதுமக்களின் சுகாதாரத்தைப் பாதுகாப்பதற்கும், தரமற்ற உணவுப் பொருட்கள் சந்தையில் விற்பனை செய்யப்படுவதைத் தடுப்பதற்குமான தடுப்பு நடவடிக்கை என FSSAI தெரிவித்துள்ளது.

தயாரிப்புகளை திரும்பப் பெற அறிவுறுத்தல்
சம்பந்தப்பட்ட நிறுவனங்கள், தரக்குறைபாடுகளுக்கான காரணங்களை சரிசெய்வது குறித்து விரிவான செயல் திட்டத்தை FSSAI-யிடம் சமர்ப்பிக்க வேண்டும் என்றும் உத்தரவிடப்பட்டுள்ளது.

மேலும், ஏற்கெனவே சந்தையில் விற்பனை செய்யப்பட்டுள்ள தரமற்ற தயாரிப்புகளை தன்னார்வ அடிப்படையில் (Voluntary Recall) திரும்பப் பெறுமாறும் சம்பந்தப்பட்ட நிறுவனங்களுக்கு FSSAI அறிவுறுத்தியுள்ளது.

நுகர்வோர் எச்சரிக்கையுடன் இருக்க வேண்டும்
பெருங்காயம் போன்ற சமையல் பொருட்களை வாங்கும்போது, அதன் பேக்கெட்டில் உள்ள FSSAI உரிம எண், தயாரிப்பு தேதி, காலாவதி தேதி, தொகுதி எண் (Batch Number), உற்பத்தியாளர் விவரங்கள் உள்ளிட்டவற்றை நுகர்வோர் சரிபார்த்து வாங்க வேண்டும்.

தரத்தில் சந்தேகம் ஏற்படும் உணவுப் பொருட்கள் குறித்து FSSAI-யின் Food Safety Connect தளம் அல்லது தொடர்புடைய உணவு பாதுகாப்பு அதிகாரிகளிடம் புகார் அளிக்கலாம். FSSAI சார்பில் உணவுக் கலப்படம் தொடர்பான புகார்களுக்கு 1800-11-2100 என்ற கட்டணமில்லா எண்ணும் வழங்கப்பட்டுள்ளது.

பொதுமக்களின் அன்றாட உணவில் பயன்படுத்தப்படும் பொருட்களின் தரத்தை உறுதி செய்வதில் இந்த நடவடிக்கை முக்கியத்துவம் வாய்ந்ததாக பார்க்கப்படுகிறது. அதே நேரத்தில், தடை என்பது சம்பந்தப்பட்ட நிறுவனங்களின் குறிப்பிட்ட பெருங்காயத் தயாரிப்புகளின் விற்பனைக்கானது என்பதையும் நுகர்வோர் கவனத்தில் கொள்ள வேண்டும்.