மத்தியஸ்தச் சட்டம், 2023-ன் கீழ், மத்தியஸ்த கவுன்சில் ஆஃப் இந்தியா (Mediation Council of India) அமைக்கப்பட்டுள்ளதாக மத்திய அரசு அறிவித்துள்ளது.
இதற்கான அரசிதழ் அறிவிப்பு ஆகஸ்ட் 27-ஆம் தேதி வெளியிடப்பட்டுள்ளது. இந்தக் கவுன்சிலின் தலைமையகம் புது தில்லியில் செயல்படும் எனத் தெரிவிக்கப்பட்டுள்ளது.
மத்தியஸ்த நடைமுறையை ஒழுங்குபடுத்தும் வகையில் அமைக்கப்பட்டுள்ள இந்தக் கவுன்சிலுக்கு, மத்தியஸ்தர்களை பதிவு செய்தல், மத்தியஸ்த சேவை வழங்கும் நிறுவனங்களுக்கு அங்கீகாரம் வழங்குதல் உள்ளிட்ட பல்வேறு அதிகாரங்கள் வழங்கப்பட்டுள்ளன.
மேலும், மத்தியஸ்தர்களுக்கு பயிற்சி மற்றும் சான்றிதழ் வழங்கும் நிறுவனங்களை அங்கீகரித்தல், மத்தியஸ்தம் தொடர்பான நடைமுறைகளை ஒழுங்குபடுத்துதல் ஆகியவையும் கவுன்சிலின் முக்கியப் பணிகளாகும்.
மத்தியஸ்தச் சட்டம், 2023-ன் முக்கிய நோக்கங்களில் ஒன்றாக, குறிப்பிட்ட சிவில் மற்றும் வணிகத் தகராறுகளில் நீதிமன்றம் அல்லது தீர்ப்பாயத்தை அணுகுவதற்கு முன்பாக மத்தியஸ்தம் மூலம் பிரச்னைக்கு தீர்வு காண முயற்சிப்பது இடம்பெற்றுள்ளது.
இதன் மூலம் நீண்டகால வழக்கு விசாரணையைத் தவிர்த்து, இரு தரப்பினரும் பரஸ்பர சமரசத்தின் அடிப்படையில் விரைவாகத் தீர்வு காண வாய்ப்பு ஏற்படும்.
குற்றவியல் வழக்குகள் உள்ளிட்ட சில வகையான விவகாரங்கள் மத்தியஸ்த நடைமுறையில் இருந்து விலக்கப்பட்டுள்ளன. மூன்றாம் தரப்பினரின் உரிமைகளை பாதிக்கக்கூடிய சில விவகாரங்களுக்கும் மத்தியஸ்தம் பொருந்தாது. தேவைக்கேற்ப இந்த விலக்குப் பட்டியலில் மாற்றங்களை மேற்கொள்ள மத்திய அரசுக்கு அதிகாரம் வழங்கப்பட்டுள்ளது.
மத்தியஸ்த நடைமுறை பொதுவாக 180 நாள்களுக்குள் நிறைவு செய்யப்பட வேண்டும். இரு தரப்பினரும் ஒப்புக்கொண்டால், மேலும் 180 நாள்கள் வரை கால அவகாசத்தை நீட்டிக்கலாம்.
மேலும், இரண்டு மத்தியஸ்த அமர்வுகள் நடைபெற்ற பிறகு, ஒரு தரப்பினர் மத்தியஸ்த நடைமுறையிலிருந்து விலகுவதற்கும் சட்டத்தில் வழிவகை செய்யப்பட்டுள்ளது.
இரு தரப்பினரும் ஒருமித்த கருத்துடன் தங்களுக்கு விருப்பமான நபரை மத்தியஸ்தராக நியமித்துக் கொள்ளலாம். மத்தியஸ்தரைத் தேர்வு செய்வதில் உடன்பாடு ஏற்படாத நிலையில், மத்தியஸ்த சேவை வழங்கும் நிறுவனத்தை அணுகலாம். அந்த நிறுவனம் தனது பட்டியலில் இடம்பெற்றுள்ள தகுதியான மத்தியஸ்தர் ஒருவரை நியமிக்கும்.
மத்தியஸ்தத்தின் மூலம் இரு தரப்பினருக்கும் இடையே உடன்பாடு ஏற்பட்டால், அந்த ஒப்பந்தம் சட்டப்பூர்வமாக இரு தரப்பினரையும் கட்டுப்படுத்தும். மேலும், நீதிமன்றத் தீர்ப்பு அல்லது உத்தரவு போன்றே அதனை அமல்படுத்த முடியும்.
மத்தியஸ்த கவுன்சில் ஆஃப் இந்தியா அமைக்கப்பட்டுள்ளதன் மூலம், நீதிமன்றத்துக்கு வெளியே தகராறுகளை சமரச அடிப்படையில் தீர்ப்பதற்கான கட்டமைப்பு மேலும் வலுப்பெறும் என எதிர்பார்க்கப்படுகிறது.
குறிப்பாக, சிவில் மற்றும் வணிகத் தகராறுகளில் மத்தியஸ்த நடைமுறையை திறம்பட பயன்படுத்துவதன் மூலம் வழக்குகளின் காலதாமதத்தைக் குறைக்கவும், நீதிமன்றங்களின் பணிச்சுமையை குறைக்கவும், தரப்பினருக்கு விரைவான தீர்வை வழங்கவும் வாய்ப்பு ஏற்படும் எனக் கருதப்படுகிறது.
இந்தியாவில் மத்தியஸ்த நடைமுறையை நிறுவன ரீதியாக வலுப்படுத்தும் முக்கிய நடவடிக்கையாக மத்தியஸ்த கவுன்சில் ஆஃப் இந்தியா அமைப்பு பார்க்கப்படுகிறது.
