நெடுஞ்சாலைத்துறை நமக்குத் தரும் சர்பிரைஸுகளுக்கு அளவே இல்லை. திண்டுக்கல் பழனி பைபாஸில் இருந்து வத்தலகுண்டு பைபாஸ் செல்லும் சர்வீஸ் ரோட்டில், பொதுமக்களுக்காக ஒரு பிரம்மாண்டமான “இலவச வாட்டர் தீம் பார்க்” திறக்கப்பட்டுள்ளது.
சாதாரண தண்ணீர் இருந்தால் பரவாயில்லை, அதில் ‘நறுமணம்’ மிக்க சாக்கடை நீரை நிரப்பி, கூடவே டைனோசர் காலத்து நடுகல் போல ஒரு பெரிய பள்ளத்தையும் வெட்டி வைத்திருக்கிறார்கள்.
“ஸ்லோ மோஷன்” பயணம்!
இந்தச் சாலை வழியாகச் செல்லும் வாகன ஓட்டிகள், ஏதோ நிலவில் கால் வைக்கும் விண்வெளி வீரர்கள் போல தட்டுத்தடுமாறிச் செல்கிறார்கள். ஒரு குட்டி வண்டி இந்தப் பள்ளத்தைக் கடந்து அக்கறைக்குச் செல்ல விடிந்து விடுகிறதாம் (அதாவது, வெறும் 5 நிமிடங்கள் ஆகிறதாம்!). இதனால், அவசரமாக ஆபீஸுக்கோ, மருத்துவமனைக்கோ போக நினைப்பவர்கள், வழியிலேயே தியானம் பழகிக் கொள்ள நல்ல வாய்ப்பு கிடைத்துள்ளது.
நள்ளிரவில் நடந்த ‘லைட் ஷோ’!
நேற்று இரவு சுமார் 2 மணி அளவில், இந்தச் சாக்கடைக் குளத்தைக் கடக்க முடியாமல் கனரக வாகனங்கள் மற்றும் இதர வண்டிகள் அனைத்தும் வரிசையாக அணிவகுத்து நின்றன. பார்ப்பதற்கு ஏதோ
பிரம்மாண்ட திருவிழா காரவண் போல, கிலோமீட்டர் கணக்கில் லைட்டுகளைப் போட்டுக்கொண்டு வாகனங்கள் நின்ற காட்சி, தூங்குபவர்களைக் கூட எழுந்து ரசிக்க வைத்தது! போக்குவரத்து நெரிசல் என்பது போனஸ் அட்ராக்ஷன்.
நெடுஞ்சாலைத்துறையின் ‘ஆழ்ந்த’ மௌனம்…
“ஏன் இன்னும் நடவடிக்கை எடுக்கவில்லை?” என்று பொதுமக்கள் கேட்டதற்கு, நெடுஞ்சாலைத்துறை அதிகாரிகள் மைண்ட் வாய்ஸில், “நாங்கள் ரோடு போட்டால் அது வெறும் ரோடு… ஆனால், அதில் சாக்கடையையும் பள்ளத்தையும் கலந்து கொடுத்தால் அது ஒரு ‘அட்வென்ச்சர் ஸ்போர்ட்ஸ்’” என்று நினைத்துக் கொண்டிருக்கிறார்களோ என்னவோ!
யாராவது பெரிய விபத்தில் சிக்கி, உயிருக்கே ஆபத்து ஏற்படும் வரை இந்த “சம்பிரதாய” பள்ளத்தை அப்படியே மெயின்டெய்ன் செய்ய அதிகாரிகள் திட்டமிட்டுள்ளதாக வாகன ஓட்டிகள் குமுறுகின்றனர்.
விபத்துகள் நடப்பதற்குள் இந்த “சாக்கடை நீச்சல் குளத்தை” மூடி, சாலையைச் சீரமைத்தால், வாகன ஓட்டிகளின் சாபத்திலிருந்தாவது நெடுஞ்சாலைத்துறை தப்பிக்கலாம்!
