தென்காசி மாவட்டம் வாசுதேவநல்லூரில், மதிமுக பொதுச் செயலாளர் வைகோ தலைமையில் ஆயிரத்திற்கும் மேற்பட்ட விவசாயிகள் மற்றும் பல்வேறு அரசியல் கட்சியினர் பங்கேற்ற மாபெரும் உண்ணாவிரதப் போராட்டம் நடைபெற்றது.
செண்பகவல்லி அணையைச் சீரமைத்தல்:
சேதமடைந்துள்ள செண்பகவல்லி அணையை மத்திய மற்றும் இரு மாநில (தமிழக-கேரள) அரசுகள் தலையிட்டு உடனடியாகச் சீரமைக்க வேண்டும். இதன் மூலம் பல ஆயிரம் ஏக்கர் விவசாய நிலங்கள் பயன்பெறும்; விருதுநகர் மாவட்டம் வரை நிலத்தடி நீர்மட்டம் உயரும்.
உள்ளாறு அணைத் திட்டம்:
தேக்கமடைந்துள்ள உள்ளாறு அணைத் திட்டப் பணிகளை உடனடியாகச் சரிசெய்து பயன்பாட்டிற்கு கொண்டு வர வேண்டும்.
காட்டுப்பன்றிகள் தொல்லைக்கு தீர்வு:
மேற்குத் தொடர்ச்சி மலை அடிவாரப் பகுதிகளில் விவசாயத்திற்குப் பெரும் பாதிப்பை ஏற்படுத்தும் காட்டுப்பன்றிகளை, வனவிலங்குப் பட்டியலிலிருந்து நீக்க வேண்டும்.
இந்த உண்ணாவிரதப் போராட்டத்தில் கடையநல்லூர் சட்டமன்ற உறுப்பினர் தி.மு.ராஜேந்திரன், முன்னாள் சட்டமன்ற உறுப்பினர் சதன் திருமலைகுமார், மதிமுக நிர்வாகிகள், இடதுசாரி கட்சியினர் மற்றும் 30-க்கும் மேற்பட்ட பொதுநல அமைப்புகள் அரசியலுக்கு அப்பாற்பட்டு விவசாயிகளின் நலனுக்காக ஒன்றிணைந்து பங்கேற்றனர்.
