கூட்டுறவு வங்கிகளில் விவசாயிகளிடம் மேற்கொள்ளப்பட்டு வரும் பயிர்க்கடன் நிலுவை வசூல் நடவடிக்கைகளை மறு உத்தரவு வரும் வரை தற்காலிகமாக நிறுத்தி வைக்க வேண்டும் என கூட்டுறவுச் சங்கங்களின் பதிவாளர் அலுவலகம் உத்தரவிட்டுள்ளது.
இதுதொடர்பாக கூட்டுறவுச் சங்கங்களின் பதிவாளர் கலா, இ.ஆ.ப., வழிகாட்டுதலின்படி, கூடுதல் பதிவாளர் எஸ். சுப்பிரமணியன் வெளியிட்டுள்ள சுற்றறிக்கையில் (எண்:18/2026, நாள்:21.09.2026) இந்த அறிவுறுத்தல் தெரிவிக்கப்பட்டுள்ளது.
2026-27ஆம் நிதியாண்டில் தகுதியுள்ள அனைத்து விவசாயிகளுக்கும் பயிர்க்கடன் வழங்க நடவடிக்கை எடுக்கப்பட்டு வரும் நிலையில், பயிர்க்கடன் தள்ளுபடி திட்டம்-2026 கீழ் பகுதி தள்ளுபடி பெற்ற சில விவசாயிகள், மீதமுள்ள கடன் தொகையை செலுத்தாத காரணத்தால் வசூல் நடவடிக்கைகள் மேற்கொள்ளப்பட்டு வந்தன.
இந்நிலையில், விவசாயிகள் நலனை கருத்தில் கொண்டு, பயிர்க்கடன் நிலுவை தொடர்பான அனைத்து வகையான வசூல் நடவடிக்கைகளையும் மறு உத்தரவு வரும் வரை நிறுத்தி வைக்குமாறு கூட்டுறவுத்துறை அறிவுறுத்தியுள்ளது.
மேலும், பயிர்க்கடனை முழுமையாக திருப்பிச் செலுத்திய விவசாயிகளுக்கு வரும் செப்டம்பர் 30-ஆம் தேதிக்குள் புதிய பயிர்க்கடன் வழங்க வேண்டும் எனவும் தெரிவிக்கப்பட்டுள்ளது.
இந்த உத்தரவை அனைத்து கூட்டுறவு சங்கங்களுக்கும் உடனடியாகத் தெரிவித்து, முறையாக நடைமுறைப்படுத்தப்படுவதை உறுதி செய்ய வேண்டும் என மண்டல இணைப்பதிவாளர்கள் மற்றும் மத்திய கூட்டுறவு வங்கி மேலாண்மை இயக்குநர்களுக்கு அறிவுறுத்தப்பட்டுள்ளது.
