நெல் கொள்முதல் நிலையங்களில் விவசாயிகளிடம் இருந்து கட்டாயப் பணம் வசூலித்தல் உள்ளிட்ட முறைகேடுகள் நடைபெற்றால், அதுகுறித்து வாட்ஸ்அப் மூலம் புகார் அளிக்கலாம் என தமிழக அரசு தெரிவித்துள்ளது.
இதுகுறித்து செய்தி மக்கள் தொடர்புத்துறை வெளியிட்டுள்ள செய்திக்குறிப்பில் கூறியிருப்பதாவது:
நடப்பு 2026–2027 கொள்முதல் பருவத்தில், மத்திய அரசின் குறைந்தபட்ச ஆதரவு விலையுடன் சேர்த்து தமிழக அரசு வழங்கும் நெல் ஊக்கத்தொகை உயர்த்தப்பட்டுள்ளது.
சன்னரக நெல்லுக்கு குவிண்டாலுக்கு வழங்கப்பட்டு வந்த ஊக்கத்தொகை ரூ.156-லிருந்து ரூ.289 ஆகவும், பொதுரக நெல்லுக்கு வழங்கப்பட்டு வந்த ஊக்கத்தொகை ரூ.131-லிருந்து ரூ.159 ஆகவும் உயர்த்தப்பட்டுள்ளது.
இதன்படி, நடப்பு கொள்முதல் பருவத்தில் சன்னரக நெல்லுக்கு குவிண்டால் ஒன்றுக்கு ரூ.2,750-ம், பொதுரக நெல்லுக்கு ரூ.2,600-ம் வழங்கப்படுகிறது.
1.17 லட்சம் டன் நெல் கொள்முதல்
செப்டம்பர் 1-ஆம் தேதி முதல் கொள்முதல் பருவம் தொடங்கப்பட்ட நிலையில், செப்டம்பர் 3-ஆம் தேதி முதல் விவசாயிகளிடமிருந்து நேரடி நெல் கொள்முதல் செய்யப்பட்டு வருகிறது.
இதுவரை 20,196 விவசாயிகளிடமிருந்து சுமார் 1.17 லட்சம் மெட்ரிக் டன் நெல் கொள்முதல் செய்யப்பட்டுள்ளதாக தமிழக அரசு தெரிவித்துள்ளது.
நெல் கொள்முதல் பணிகளில் முழு வெளிப்படைத்தன்மையை உறுதி செய்யும் வகையில், நிலையான வழிகாட்டு நெறிமுறைகள் (SOP) அடங்கிய அரசாணை கடந்த 15.09.2026 அன்று வெளியிடப்பட்டுள்ளது.
கொள்முதல் நிலையங்களில் ஏதேனும் குறைபாடுகள், தாமதம் அல்லது சட்டவிரோதமாக பணம் வசூலித்தல் போன்ற புகார்கள் இருந்தால், தமிழ்நாடு நுகர்பொருள் வாணிபக் கழகத்தின் “உழவர் உதவி மைய” வாட்ஸ்அப் எண்ணில் விவசாயிகள் தெரிவிக்கலாம்.
வாட்ஸ்அப் எண்: 9500801465
விவசாயிகள் இந்த வசதியை பயன்படுத்தி தங்களது கோரிக்கைகள் மற்றும் புகார்களை பதிவு செய்யுமாறு கேட்டுக்கொள்ளப்பட்டுள்ளனர்.
