தமிழகத்தில் பாரம்பரியமாக நடத்தப்பட்டு வரும் சேவல் சண்டைக்கு முழுமையான தடை விதிக்கப்படவில்லை என சென்னை உயர் நீதிமன்றத்தில் காவல் துறை தலைமை இயக்குநர் (டிஜிபி) தரப்பில் விளக்கம் அளிக்கப்பட்டுள்ளது.
சேவல் சண்டை என்ற பெயரில் நடைபெறும் சூதாட்டம், சேவல்களின் கால்களில் கத்தி கட்டி காயப்படுத்துதல் உள்ளிட்ட சட்டவிரோத செயல்களைத் தடுக்கும் வகையிலேயே காவல்துறை சார்பில் சுற்றறிக்கை பிறப்பிக்கப்பட்டதாக தெரிவிக்கப்பட்டது.
சேவல் சண்டை நடத்த அனுமதி கோரி தாக்கல் செய்யப்பட்ட மனுக்கள் மீதான விசாரணையில், காவல்துறை தரப்பில் இந்த விளக்கம் அளிக்கப்பட்டது.
இதனை பதிவு செய்து கொண்ட நீதிமன்றம், தமிழகத்தில் சேவல் சண்டைக்கு பொதுவான தடை எதுவும் இல்லை என்பதால், விதிமுறைகளுக்கு உட்பட்டு நடத்த அனுமதி கோரி சம்பந்தப்பட்ட காவல்துறையினரிடம் மனு அளிக்கலாம் என உத்தரவிட்டது.
மேலும், மனுக்களை பரிசீலிக்கும் போது சட்ட விதிமுறைகள், விலங்குகள் பாதுகாப்பு விதிகள் ஆகியவற்றை கடைப்பிடிக்க வேண்டும் எனவும் அறிவுறுத்தப்பட்டது.
சேவல் சண்டையின் போது கத்தி கட்டுதல், சூதாட்டம் நடத்துதல், சேவல்களை துன்புறுத்துதல் போன்ற செயல்களுக்கு அனுமதி இல்லை எனவும் நீதிமன்றம் தெளிவுபடுத்தியுள்ளது.
