தமிழ்நாட்டில் மாநகராட்சிகள், நகராட்சிகள், பேரூராட்சிகள் மற்றும் கிராம ஊராட்சிகள் கட்டிட அனுமதி வழங்குவதற்கான அதிகார வரம்புகளை உயர்த்தி, வீட்டுவசதி மற்றும் நகர்ப்புற வளர்ச்சித் துறை சார்பில் புதிய அரசாணையைத் தமிழக அரசு வெளியிட்டுள்ளது.
G.O.(Ms) No.180, நாள்: 08.10.2026-ன்படி, சிறிய மற்றும் நடுத்தர அளவிலான குடியிருப்பு, வணிகக் கட்டிடங்களுக்கான அனுமதி நடைமுறைகளை எளிமைப்படுத்தி, விரைவாக ஒப்புதல் வழங்குவதே இந்நடவடிக்கையின் நோக்கமாகும்.
மாநகராட்சிகள், நகராட்சிகள்: குடியிருப்புக் கட்டிடங்களுக்கு அதிகபட்சம் 1,500 சதுர மீட்டர் FSI பரப்பளவு, 16 குடியிருப்பு அலகுகள் மற்றும் 14 மீட்டர் உயரம் வரையிலான கட்டிடங்களுக்கு அனுமதி வழங்கும் அதிகார வரம்பு குறிப்பிடப்பட்டுள்ளது. வணிகக் கட்டிடங்களுக்கு 500 சதுர மீட்டர் FSI பரப்பளவு வரை அனுமதி வழங்க வழிவகை செய்யப்பட்டுள்ளது.
பேரூராட்சிகள், கிராம ஊராட்சிகள்: குடியிருப்புக் கட்டிடங்களுக்கு 1,200 சதுர மீட்டர் FSI பரப்பளவு, அதிகபட்சம் 12 குடியிருப்பு அலகுகள் மற்றும் 14 மீட்டர் உயரம் வரையிலான கட்டிடங்களுக்கு அனுமதி வழங்கும் அதிகார வரம்பு நிர்ணயிக்கப்பட்டுள்ளது. வணிகக் கட்டிடங்களுக்கு 500 சதுர மீட்டர் FSI பரப்பளவு வரை அனுமதி வழங்கலாம்.
பொதுமக்களுக்கு என்ன பயன்? : கட்டிட அனுமதி பெறுவதற்கான நடைமுறைகள் எளிமையாவதுடன், உரிய விதிமுறைகளுக்கு உட்பட்ட கட்டிடங்களுக்கு உள்ளாட்சி அமைப்புகள் வாயிலாகவே விரைவாக ஒப்புதல் பெறுவதற்கான வாய்ப்பு அதிகரிக்கும். இதனால் பொதுமக்கள், சிறு வணிகர்கள் மற்றும் கட்டுமானத் துறையினர் பயனடைவார்கள் என எதிர்பார்க்கப்படுகிறது.
இந்த அரசாணையைச் செயல்படுத்துமாறு நகர் ஊரமைப்பு ஆணையர் மற்றும் சென்னைப் பெருநகர் வளர்ச்சிக் குழுமத்தின் (CMDA) உறுப்பினர் செயலருக்கு வீட்டுவசதி மற்றும் நகர்ப்புற வளர்ச்சித் துறை முதன்மைச் செயலர் ஆர். கிர்லோஷ் குமார் அறிவுறுத்தியுள்ளார்.
குறிப்பு: கட்டிட அனுமதிக்கான தகுதி, FSI கணக்கீடு, சாலை அகலம், நிலப் பயன்பாடு மற்றும் பிற கட்டிட விதிமுறைகளுக்கு உட்பட்டே அமையும்
