மதுராந்தகம் (தனி) மற்றும் தாராபுரம் (தனி) சட்டப்பேரவைத் தொகுதிகளுக்கு அக்டோபர் 6-ஆம் தேதி நடைபெற உள்ள இடைத்தேர்தலில் போட்டியிடும் அதிமுக வேட்பாளர்களை அக்கட்சியின் பொதுச் செயலாளரும், முன்னாள் முதல்வருமான எடப்பாடி கே. பழனிசாமி அறிவித்துள்ளார்.
அதிமுக ஆட்சி மன்றக் குழு பரிசீலனை செய்து எடுத்த முடிவின் அடிப்படையில் வேட்பாளர்கள் தேர்வு செய்யப்பட்டுள்ளதாக கட்சி அறிவித்துள்ளது.
இதன்படி, மதுராந்தகம் (தனி) சட்டப்பேரவைத் தொகுதியில் அதிமுக சார்பில் முன்னாள் சட்டமன்ற உறுப்பினர் கணிதா சம்பத் போட்டியிடுகிறார். இவர் அதிமுக தலைமைச் செயற்குழு உறுப்பினராகவும், கழக மகளிர் அணி இணைச் செயலாளராகவும் உள்ளார்.
தாராபுரம் (தனி) சட்டப்பேரவைத் தொகுதியில் அதிமுக வேட்பாளராக கே. பானுமதி அறிவிக்கப்பட்டுள்ளார். இவர் திருப்பூர் புறநகர் கிழக்கு மாவட்ட மகளிர் அணி இணைச் செயலாளராகவும், மாவட்ட ஊராட்சிக் குழு 12-ஆவது வார்டு முன்னாள் உறுப்பினராகவும் உள்ளார்.
இரு தொகுதிகளிலும் இடைத்தேர்தல் பணிகள் தீவிரமடைந்துள்ள நிலையில், அதிமுக தனது வேட்பாளர்களை அறிவித்துள்ளது.
