மின்வாரிய ஒப்பந்தத் தொழிலாளர்களுக்கு விபத்து இழப்பீடு இரட்டிப்பு!

தமிழ்நாடு மின் பகிர்மானக் கழகத்தில் (TNPDCL) ஒப்பந்ததாரர்கள் மூலம் பணியாற்றும் தொழிலாளர்களுக்கு, பணியின்போது ஏற்படும் மின்சாரம் மற்றும் இயந்திர விபத்துகளுக்கான இழப்பீட்டுத் தொகையை தமிழக அரசு உயர்த்தியுள்ளது.

இதன்படி, உயிரிழப்புக்கான இழப்பீடு ₹5 லட்சத்தில் இருந்து ₹10 லட்சமாக உயர்த்தப்பட்டுள்ளது. கடுமையான காயம் அல்லது ஊனம் ஏற்படும் நிலையில் வழங்கப்பட்டு வந்த இழப்பீடு ₹2 லட்சத்தில் இருந்து ₹3 லட்சமாகவும், ஒரு கை, கால் அல்லது ஒரு கண் இழப்பு போன்ற பகுதி பாதிப்புகளுக்கான இழப்பீடு ₹1 லட்சத்தில் இருந்து ₹1.50 லட்சமாகவும் உயர்த்தப்பட்டுள்ளது.

புதிய இழப்பீடு விவரம்

03.09.2026 முதல் ஏற்படும் விபத்துகளுக்கு இந்த உயர்த்தப்பட்ட இழப்பீட்டுத் தொகை பொருந்தும் என தெரிவிக்கப்பட்டுள்ளது. பாதிக்கப்பட்ட தொழிலாளர்கள் அல்லது உயிரிழந்தவர்களின் வாரிசுகளுக்கு உரிய நடைமுறைகளின்படி இழப்பீடு வழங்கப்படும்.

இழப்பீட்டுத் தொகையை வழங்குவது தொடர்பாக உரிய தலைமைப் பொறியாளர்கள் பரிசீலித்து நடவடிக்கை மேற்கொள்வார்கள். மின்வாரியத் தலைவரின் உத்தரவின் பேரில், பணியாளர் தலைமைப் பொறியாளர் எம். கலைச்செல்வி, இதற்கான செயல்முறை ஆணையை பிறப்பித்துள்ளார்.

பணியின் போது ஆபத்தான சூழ்நிலைகளை எதிர்கொள்ளும் ஒப்பந்தத் தொழிலாளர்களுக்கும், அவர்களது குடும்பங்களுக்கும் இந்த இழப்பீட்டு உயர்வு முக்கியமான நிவாரணமாக அமையும்.