பரமக்குடி அரசு மருத்துவமனையில் இரு தரப்பினரிடையே ஏற்பட்ட மோதலைத் தடுக்க முயன்ற பெண் காவலர் கீழே விழுந்து உயிரிழந்த சம்பவம் பரபரப்பை ஏற்படுத்தியுள்ளது.
ராமநாதபுரம் மாவட்டம், பார்த்திபனூர் காவல் நிலையத்தில் பணியாற்றி வந்த பெண் காவலர் கன்னகி (35), திங்கள்கிழமை (செப். 28) இரவு பரமக்குடி அரசு மருத்துவமனையில் பாதுகாப்புப் பணியில் ஈடுபட்டிருந்தார்.
அப்போது, வெளியே ஏற்பட்ட மோதலில் காயமடைந்த சில இளைஞர்கள் சிகிச்சைக்காக மருத்துவமனைக்கு வந்துள்ளனர். மருத்துவமனை வளாகத்தில் அவர்களுக்கும் மற்றொரு தரப்பினருக்கும் இடையே மீண்டும் மோதல் ஏற்படும் சூழல் ஏற்பட்டதாகக் கூறப்படுகிறது.
இதையடுத்து, இரு தரப்பினரையும் விலக்கி மோதலைத் தடுக்க கன்னகி முயன்றுள்ளார். அப்போது கருப்புராஜா எனக் கூறப்படும் இளைஞர் ஒருவர் அவரை தள்ளியதாகவும், இதில் நிலைதடுமாறி கீழே விழுந்த கன்னகிக்கு தலையில் பலத்த காயம் ஏற்பட்டதாகவும் தகவல் வெளியாகியுள்ளது.
இதையடுத்து மருத்துவமனையில் அவருக்கு சிகிச்சை அளிக்க நடவடிக்கை மேற்கொள்ளப்பட்ட நிலையில், அவர் உயிரிழந்தார்.
இதுகுறித்து தகவலறிந்த ராமநாதபுரம் மாவட்ட காவல் கண்காணிப்பாளர் ஜி. சந்தீஷ், பரமக்குடி டிஎஸ்பி சுகுமாரன் ஆகியோர் மருத்துவமனைக்கு நேரில் சென்று விசாரணை மேற்கொண்டுவருகின்றனர்.
