சங்கரன்கோவில் மற்றும் சுற்றுவட்டாரப் பகுதிகளில் பொதுமக்கள் தலைமுறை தலைமுறையாக அனுபவித்து வரும் நிலங்கள், சங்கரநாராயணசுவாமி கோயிலுக்குச் சொந்தமானவை என அறிவிக்கப்பட்டுள்ளதாகக் கூறி, அந்த நிலங்களுக்கான வழிகாட்டி மதிப்பை பூஜ்ஜியமாக மாற்றிய நடவடிக்கையை ரத்து செய்யக் கோரி, மாவட்ட ஆட்சியர் ரஞ்ஜித் சிங்கிடம் சங்கரன்கோவில் சட்டப்பேரவை உறுப்பினர் திலீபன் ஜெய்சங்கர் மனு அளித்தார்.
மனுவில், சங்கரன்கோவில் சுற்றுவட்டாரத்தில் உள்ள பல கிராமங்களில் பொதுமக்கள் தலைமுறை தலைமுறையாக குடியிருந்து வருவதுடன், விவசாய நிலங்களையும் அனுபவித்து வருகின்றனர். இந்நிலையில், அந்த நிலங்கள் சங்கரநாராயணசுவாமி கோயிலுக்குச் சொந்தமானவை என இந்து சமய அறநிலையத் துறை அறிவித்துள்ளதாகக் கூறப்பட்டுள்ளது.
இதன் காரணமாக, சார் பதிவாளர் அலுவலகத்தில் சம்பந்தப்பட்ட நிலங்களுக்கான வழிகாட்டி மதிப்பு பூஜ்ஜியமாக மாற்றப்பட்டுள்ளதாகவும், இதனால் பொதுமக்கள் தங்களது நிலங்களை விற்பனை செய்யவோ, அடமானம் வைக்கவோ, வாரிசுகளுக்கு பாகப்பிரிவினை செய்யவோ முடியாமல் பாதிக்கப்பட்டுள்ளதாகவும் தெரிவிக்கப்பட்டுள்ளது.
மேலும், சம்பந்தப்பட்ட நிலங்கள் கோயிலுக்குச் சொந்தமானவை என்பதை உறுதிப்படுத்தும் கிரய ஆவணங்கள் உள்ளிட்ட ஆவணங்கள் இந்து சமய அறநிலையத் துறையிடமோ, கோயில் நிர்வாகத்திடமோ இல்லை என்றும், பொதுமக்களிடம் பட்டா, தீர்வை ரசீதுகள் மற்றும் அசல் ஆவணங்கள் தங்களது பெயரில் இருப்பதாகவும் மனுவில் குறிப்பிடப்பட்டுள்ளது.
எனவே, மாவட்ட ஆட்சியர் இந்த விவகாரத்தில் உரிய விசாரணை நடத்தி, சார் பதிவாளர் அலுவலகத்தில் நிலங்களின் வழிகாட்டி மதிப்பு பூஜ்ஜியமாக மாற்றப்பட்டதை ரத்து செய்து, பொதுமக்களின் நில உரிமை தொடர்பான ஆவணங்களை ஆய்வு செய்து உரிய நடவடிக்கை எடுக்க வேண்டும் என எம்எல்ஏ கோரியுள்ளார்.
பின்னர் செய்தியாளர்களிடம் திலீபன் ஜெய்சங்கர் கூறியதாவது:
சங்கரநாராயணசுவாமி கோயிலுக்குச் சொந்தமான நிலங்களை மீட்பதாக கடந்த ஆட்சிக் காலத்தில் எடுக்கப்பட்ட நடவடிக்கையின் தொடர்ச்சியாக, சுமார் 20 கிராமங்களில் வசிக்கும் மக்களை அவர்களது குடியிருப்புகளில் இருந்து வெளியேற்ற அதிகாரிகள் முயன்று வருகின்றனர்.
தங்களது நிலங்களுக்கான முறையான ஆவணங்கள் இருந்தும், அவசரத் தேவைக்காக நிலங்களை அடமானம் வைக்கவோ, விற்பனை செய்யவோ முடியாத நிலைக்கு மக்கள் தள்ளப்பட்டுள்ளனர். இதுதொடர்பாக சம்பந்தப்பட்ட துறை அமைச்சரிடமும் மனு அளித்துள்ளேன்.
மேலும், நீதிமன்றத்திலும் பொதுமக்கள் தங்களது ஆவணங்களை தாக்கல் செய்துள்ளனர். கோயில் நிலம் என்பதற்கான உரிய ஆவணங்கள் இருந்தால் அவற்றை சமர்ப்பித்து நிலங்களை மீட்டுக்கொள்ளலாம் என நீதிமன்றம் உத்தரவிட்டிருந்தபோதிலும், அதிகாரிகள் அந்த ஆவணங்களை சமர்ப்பிக்காமல் செயல்பட்டு வருகின்றனர்.
இதுகுறித்து மாவட்ட ஆட்சியர் ரஞ்ஜித் சிங்கை சந்தித்து மனு அளித்துள்ளேன். உரிய நடவடிக்கை எடுப்பதாக அவர் தெரிவித்துள்ளார் என்றார்.
இந்நிகழ்வின்போது மாவட்ட எம்ஜிஆர் இளைஞரணி செயலர் சந்திரன், ஜெ. பேரவை பொருளாளர் பாலாஜி, மானூர் வடக்கு ஒன்றிய துணைச் செயலர் மதுரம் உள்ளிட்டோர் உடனிருந்தனர்.
