தமிழக காவல் துறையில் பணியாற்றும் காவலர்கள் மற்றும் அதிகாரிகள் மீது நிலுவையில் உள்ள குற்ற வழக்குகள், அவற்றில் எடுக்கப்பட்டுள்ள துறைரீதியான நடவடிக்கைகள் குறித்த முழு விவரங்களை அறிக்கையாக தாக்கல் செய்ய டிஜிபிக்கு சென்னை உயர் நீதிமன்ற மதுரை கிளை உத்தரவிட்டுள்ளது.
தேனியைச் சேர்ந்த எம். சௌந்தரபாண்டியன், 2022-23ஆம் ஆண்டுக்கான இரண்டாம் நிலைக் காவலர் தேர்வில் பங்கேற்று 86 மதிப்பெண்கள் பெற்றும், தமக்கு எதிரான குற்ற வழக்கை காரணம் காட்டி பணி நியமனம் மறுக்கப்பட்டதாகக் கூறி மனு தாக்கல் செய்திருந்தார். அந்த வழக்கில் பின்னர் தாம் விடுவிக்கப்பட்டதாகவும் அவர் தெரிவித்திருந்தார்.
இந்த மனு நீதிபதி பி. புகழேந்தி முன் விசாரணைக்கு வந்தது. அப்போது, காவல் பணிக்கு புதிதாக தேர்வு செய்யப்படுவோரின் குற்றப் பின்னணி தீவிரமாக பரிசீலிக்கப்படும் நிலையில், ஏற்கெனவே பணியில் உள்ள காவலர்கள் மற்றும் அதிகாரிகள் மீது குற்ற வழக்குகள் நிலுவையில் இருந்தால் எடுக்கப்படும் நடவடிக்கைகள் குறித்து நீதிபதி கேள்வி எழுப்பினார்.
மேலும், குற்ற வழக்குகள் மற்றும் லஞ்ச ஒழிப்பு வழக்குகளில் சிக்கிய காவல் பணியாளர்கள் மீது துறைரீதியான நடவடிக்கைகள் நீண்ட காலமாக நிலுவையில் இருப்பது குறித்தும் நீதிமன்றம் கவனம் செலுத்தியது.
இதையடுத்து, குற்ற வழக்குகள் நிலுவையில் உள்ள காவலர்கள் மற்றும் அதிகாரிகளின் எண்ணிக்கை, வழக்குகள் நிலுவையில் உள்ள காலம், அவர்களுக்கு எதிராக எடுக்கப்பட்ட துறைரீதியான நடவடிக்கைகள் மற்றும் அவற்றின் தற்போதைய நிலை ஆகிய விவரங்களைத் தொகுத்து டிஜிபி அறிக்கை தாக்கல் செய்ய உத்தரவிடப்பட்டது.
மேலும், குற்ற வழக்கு நிலுவையில் உள்ள காவல் பணியாளர்களுக்கு எதிரான துறைரீதியான விசாரணை தொடர்பான விதிமுறைகள் முறையாகப் பின்பற்றப்படுகின்றனவா என்பதையும் அறிக்கையில் தெரிவிக்க நீதிமன்றம் அறிவுறுத்தியது.
இந்த வழக்கின் அடுத்தகட்ட விசாரணை செப்டம்பர் 28ஆம் தேதிக்கு ஒத்திவைக்கப்பட்டது.
