அமெரிக்க அதிபர் டொனால்ட் டிரம்ப் நிர்வாகத்துக்கும் முன்னணி செய்தி ஊடகங்களுக்கும் இடையிலான மோதல் தீவிரமடைந்துள்ள நிலையில், வெள்ளை மாளிகை சார்பில் 24 மணி நேர டிஜிட்டல் நேரலை சேவை தொடங்கப்பட்டுள்ளதாகத் தெரிவிக்கப்பட்டுள்ளது.
அதிபர் நிர்வாகத்தின் நடவடிக்கைகள் குறித்து செய்தி வெளியிடுவதில் ஊடகங்களுக்கும் வெள்ளை மாளிகைக்கும் இடையே கருத்து வேறுபாடுகள் தொடர்ந்து நிலவி வருகின்றன. குறிப்பாக CNN, MS NOW மற்றும் Politico உள்ளிட்ட செய்தி நிறுவனங்களின் செய்தியாளர்களுக்கு வெள்ளை மாளிகையில் செய்தி சேகரிப்பதற்கான அணுகலில் கட்டுப்பாடுகள் விதிக்கப்பட்டதாக கூறப்படுகிறது.
அந்த ஊடகங்கள் அதிபர் டிரம்ப் மற்றும் அவரது நிர்வாகம் தொடர்பாக தவறான தகவல்களை வெளியிடுவதாக வெள்ளை மாளிகை தரப்பில் குற்றச்சாட்டுகள் முன்வைக்கப்பட்டுள்ளன. இதற்கு சம்பந்தப்பட்ட ஊடகங்கள் எதிர்ப்பு தெரிவித்துள்ளன.
பிரஸ் பூல் புறக்கணிப்பு
அமெரிக்க அதிபரின் நிகழ்ச்சிகள் மற்றும் முக்கிய சந்திப்புகளை செய்தியாளர்கள் சுழற்சி முறையில் பதிவு செய்து, அதன் காணொளி மற்றும் பிற செய்திப் பதிவுகளை மற்ற ஊடகங்களுடன் பகிர்ந்து கொள்வது வழக்கமாக உள்ளது. இது ‘பிரஸ் பூல்’ எனப்படுகிறது.
CNN உள்ளிட்ட ஊடகங்களுக்கு விதிக்கப்பட்ட கட்டுப்பாடுகளுக்கு எதிர்ப்பு தெரிவித்து ABC, CBS, NBC மற்றும் Fox News உள்ளிட்ட முன்னணி செய்தி நிறுவனங்கள் இந்த சுழற்சி ஒளிபரப்பு நடவடிக்கையில் பங்கேற்பதை தற்காலிகமாக நிறுத்தியதாகத் தெரிவிக்கப்பட்டுள்ளது.
அரசு செய்தியாளர்களைத் தேர்வு செய்வது அல்லது குறிப்பிட்ட ஊடகங்களுக்கு மட்டும் செய்தி சேகரிப்பில் அணுகலை வழங்குவது அமெரிக்க அரசியலமைப்பின் முதல் திருத்தம் உறுதி செய்யும் பத்திரிகைச் சுதந்திரம் தொடர்பான கேள்விகளை எழுப்புவதாக ஊடக நிறுவனங்கள் தெரிவித்துள்ளன.
‘டிரம்ப் டிவி’ தொடக்கம்
இந்தச் சூழலில், பாரம்பரிய செய்தி ஊடகங்களின் இடைத்தரகப் பங்கின்றி பொதுமக்களை நேரடியாகச் சென்றடையும் வகையில், வெள்ளை மாளிகையின் அதிகாரப்பூர்வ யூடியூப் தளத்தில் ‘TRUMP TV: The Essentials Station’ என்ற பெயரில் 24 மணி நேர டிஜிட்டல் நேரலை தொடங்கப்பட்டுள்ளதாகத் தெரிவிக்கப்பட்டுள்ளது.
அதிபரின் உரைகள், அரசின் முக்கிய அறிவிப்புகள் மற்றும் வெள்ளை மாளிகை நிகழ்வுகளை நேரடியாக பொதுமக்களிடம் கொண்டு சேர்ப்பதே இதன் நோக்கம் என வெள்ளை மாளிகை தரப்பில் தெரிவிக்கப்பட்டுள்ளது.
நீதிமன்றத்தை நாடிய ஊடகங்கள்
ஊடக அணுகல் தொடர்பான கட்டுப்பாடுகளை எதிர்த்து CNN, Politico மற்றும் MS NOW ஆகிய நிறுவனங்கள் அமெரிக்க கூட்டாட்சி நீதிமன்றத்தில் சட்ட நடவடிக்கைகளை மேற்கொண்டுள்ளதாக கூறப்படுகிறது.
தங்களது செய்தியாளர்களுக்கான வெள்ளை மாளிகை அணுகலை மீண்டும் வழங்க வேண்டும் என்றும், அரசின் நடவடிக்கைகள் பத்திரிகைச் சுதந்திரத்தை பாதிப்பதாகவும் அந்த நிறுவனங்கள் வாதிட்டுள்ளன.
டிரம்ப் நிர்வாகத்துக்கும் அமெரிக்க செய்தி ஊடகங்களுக்கும் இடையிலான இந்த மோதல், வெள்ளை மாளிகை செய்தி அணுகல் தொடர்பான பிரச்னையைத் தாண்டி, பத்திரிகைச் சுதந்திரம், அரசின் தகவல் தொடர்பு நடைமுறைகள் மற்றும் பொதுமக்களின் தகவல் அறியும் உரிமை குறித்த விவாதத்தையும் தீவிரப்படுத்தியுள்ளது.
