பெண்கள் மற்றும் குழந்தைகளின் பாதுகாப்பு குறித்த விழிப்புணர்வை ஏற்படுத்தும் வகையில், தமிழ்நாடு காவல்துறையின் சிங்கப்பெண் சிறப்பு அதிரடிப்படை (SSF) சார்பில் பல்கலைக்கழகம் மற்றும் கல்லூரி மாணவர்களுக்கான மாநில அளவிலான குறும்படப் போட்டி அறிவிக்கப்பட்டுள்ளது.
இளைஞர்களிடையே சமூகப் பொறுப்புணர்வை வளர்த்து, பெண்கள் மற்றும் குழந்தைகளுக்கு எதிரான குற்றங்களைத் தடுப்பதில் அவர்களின் பங்களிப்பை ஊக்குவிப்பதே இப்போட்டியின் நோக்கமாகும்.
இப்போட்டிக்கான கருப்பொருள்களாக, “பெண்களின் பாதுகாப்பில் ஆண்களின் பங்கு”, “பார்வையாளரின் தலையீடு (Bystander Intervention)”, “பெண்கள் மற்றும் குழந்தைகளுக்கு எதிரான குற்றங்களைத் தடுப்பதில் சமூகத்தின் பங்கு” ஆகியவை அறிவிக்கப்பட்டுள்ளன.
போட்டியில் பங்கேற்கும் குறும்படங்கள் தமிழில் இருக்க வேண்டும். அதிகபட்சம் 2 நிமிடங்கள் வரை மட்டுமே இருக்க வேண்டும். தனிநபராகவோ அல்லது அதிகபட்சம் 5 பேர் கொண்ட குழுவாகவோ மாணவர்கள் பங்கேற்கலாம். பங்கேற்பாளர்கள் Bonafide Certificate மற்றும் பதிவு படிவத்துடன் தங்களது படைப்புகளை சமர்ப்பிக்க வேண்டும்.
குறும்படங்களை https://bit.ly/SSF என்ற இணையதள இணைப்பு மூலம் சமர்ப்பிக்கலாம். படைப்புகளை அனுப்புவதற்கான கடைசி தேதி 10.10.2026 என அறிவிக்கப்பட்டுள்ளது.
போட்டியில் வெற்றி பெறுபவர்களுக்கு முதல் பரிசாக ரூ.50,000, இரண்டாம் பரிசாக ரூ.25,000, மூன்றாம் பரிசாக ரூ.15,000 வழங்கப்பட உள்ளது.
தமிழகம் முழுவதும் உள்ள பல்கலைக்கழகம் மற்றும் கல்லூரி மாணவர்கள் தங்களது படைப்பாற்றலை வெளிப்படுத்தி, பெண்கள் மற்றும் குழந்தைகளின் பாதுகாப்பு குறித்த விழிப்புணர்வை ஏற்படுத்த இந்த வாய்ப்பை பயன்படுத்திக் கொள்ளுமாறு காவல்துறை சார்பில் கேட்டுக்கொள்ளப்பட்டுள்ளது.
